ডুমডুমা মহাবিদ্যালয় আলোচনী

      বৌদ্ধিক উত্তৰণ আৰু অলংকৰণৰ সমাহাৰ:ডুমডুমা মহাবিদ্যালয় আলোচনী

                                             বীৰ্কে বি.থাপা

        সুন্দৰ অলংকৰণ ,ৰুপসজ্জা অাৰু বিষয়বস্তুৰ বৈচিত্ৰৰে প্ৰকাশ পোৱা ডুমডুমা মহাবিদ্যালয়ৰ সদ্য প্ৰকাশিত  একচত্বাৰিংশতম অালোচনী "ঐক্যদীপ" সঁচা অৰ্থত ক'বলৈ গলে অসমীয়া সাহিত্যলৈ এক অনবদ্য সংযোজন।অালোচনীখনে এই বছৰ সমগ্ৰ উত্তৰ পূৰ্বাঞ্চলৰ ভিতৰতে দ্বিতীয় শ্ৰেষ্ঠ অালোচনীৰুপে স্বীকৃতি লাভ কৰাৰ পৰাই অালোচনীখনৰ মানদণ্ড নিৰুপণ কৰিব পাৰি।
       ১৯৬৭ চনতে স্থাপিত ডুমডুমা মহাবিদ্যালয়খনিয়ে  অাজি প্ৰায় অৰ্দ্ধ শতিকাজুৰি বিদ্যায়তনিক দিশত যথেষ্ট অৱদান অাগবঢ়াই অাহি অাজি  সমগ্ৰ অসমৰ ভিতৰতে অন্যতম শ্ৰেষ্ঠ মহাবিদ্যালয় হিচাপে পৰিগনিত হৈছে।ছাত্ৰ-ছাত্ৰী সকলৰ মাজত বৌদ্ধিক চিন্তা-চৰ্চাৰ বিকাশৰ দিশটোলৈ লক্ষ   ৰাখি ১৯৭০-৭১  চনতে প্ৰকাশ নাৰায়ণ পাটোৱাৰীৰ সম্পাদনাত  মহাবিদ্যালয়ৰ অালোচনীখনৰ প্ৰথম জন্ম দিয়া হৈছিল।সেই সময়ত অাজিৰ দৰে অাধুনিক প্ৰযুক্তিৰ বিকাশ নোহোৱাৰ বাবে অালোচনীখনৰ ৰুপ,অলংকৰণ,অংগসজ্জা অাদি উন্নত হোৱা নাছিল যদিও বিষয়বস্তুৰ গভীৰতাৰে সমৃদ্ধ অাছিল।পৰ্যায়ক্ৰমে উত্তৰণ ঘটাৰ ফলস্বৰুপে পৰৱৰ্তী কালত বংকিম চন্দ্ৰ ফাটোৱালী,জ্যোৎস্না সোনোৱাল অাদিৰ সম্পাদনাত যথেষ্ট উন্নত মানদণ্ডৰ অালোচনী প্ৰকাশ হৈ ওলোৱা পৰিলক্ষিত হয়।এই মহাবিদ্যালয়ৰ অালোচনীৰ পাততে অাত্মপ্ৰকাশ কৰা ভালে কেইগৰাকী ছাত্ৰ-ছাত্ৰীয়ে পাচলৈ অসমীয়া সাহিত্য জগততো প্ৰতিষ্ঠা লাভ কৰিবলৈ সক্ষম হয়।সেই সকলৰ ভিতৰত কৱি শ্বৰীফা খাতুন চৌধুৰী,প্ৰণতি বৰুৱা অাৰু প্ৰাৱন্ধিক বংকিম চন্দ্ৰ ফাটোৱালী ,মৰাণ জনগোষ্ঠীৰ বিশিষ্ট ইতিহাসবিদ শ্ৰীকুমাৰ দহোতীয়া অাদি বিশেষ উল্লেখযোগ্য।সাহিত্য ৰচনাৰ ক্ষেত্ৰত ছাত্ৰ-ছাত্ৰীসকলৰ মাজত অনুকুল পৰিৱেশ সৃষ্টিত সদায়ে অনুপ্ৰেৰণা যোগাই অাহিছিল অসমীয়া সাহিত্যৰ বিশিষ্ট লেখক তথা এইখন মহাবিদ্যালয়ৰে অধ্যক্ষ ৰবীন চৌধুৰী,অধ্যাপক যদু বৰপূজাৰী,বদন চন্দ্ৰ শৰ্মা ,প্ৰফুল্ল মেধি,অৰুণা গগৈ বৰুৱা অাদিৰ দৰে ব্যক্তি সকলে।সেইসকল পুৰুধা ব্যক্তিৰ পাছতে সম্প্ৰতি কেইবাগৰাকীও প্ৰবক্তাৰ তত্বাৱধানত পূৰ্বৰ সাহিত্য
সৃষ্টিৰ পৰম্পৰা অব্যাহত অাছে।অাধুনিক প্ৰযুক্তিৰ দ্ৰুত বিকাশৰ লগে লগে ডুমডুমা মহাবিদ্যালয়ৰ অালোচনীখনৰ ৰুপ,অলংকৰণ,অংগসজ্জা অাজি যথেষ্ট উন্নত হৈছে।সেইদৰে বৌদ্ধিক অাৰু বিদ্যায়তনিক দিশত মহাবিদ্যালয়খন অাগবঢ়াই যোৱাৰ লগে ছাত্ৰ-ছাত্ৰী সকলৰ সাহিত্য সৃষ্টিত বিষয়বস্তুৰ বৈচিত্ৰ অাৰু গভীৰতাও পৰিলক্ষিত হৈছে।
     ডুমডুমা মহাবিদ্যালয় অালোচনী 'ঐক্যদীপ'ৰ একচত্বাৰিংশতম (২০১৪-১৫ বৰ্ষ)সংখ্যাৰ সুন্দৰ বেটুপাত অাৰু অন্তৰ্ভাগৰ অলংকৰণে প্ৰথম দৃষ্টিতে পাঠকৰ মন অাকৃষ্ট কৰিবলৈ সক্ষম হৈছে।হিন্দী বিভাগৰ বিভাগাধ্যক্ষা হিৰণ বৈশ্য দত্তৰ তত্বাৱধানত অাৰু দেৱজিৎ দহোতীয়াৰ সম্পাদনাত প্ৰকাশিত অালোচনীখনৰ সৌষ্ঠৱ বিশেষভাৱে বৃদ্ধি কৰিছে সুধাকণ্ঠ ড:ভূপেন হাজৰিকাদেৱে ডুমডুমা মহাবিদ্যালয়লৈ অাহোঁতে দিয়া এটি বক্তৃতাই।বক্তৃতাটি বাণীবদ্ধ কৰি ৰাখিছিল অধ্যাপক যদু বৰপূজাৰী দেৱে।সেইদৰে অালোচনীখনৰ সৌষ্ঠৱ বৃদ্ধি কৰিছে অতিথি লেখক ড:বুলজিৎ বুঢ়াগোহাঁইয়ে লিখা কেৰিয়াৰ  সম্পৰ্কীয় এটি প্ৰৱন্ধই।অসমীয়া বিভাগৰ প্ৰৱন্ধৰ শিতানত প্ৰকাশিত 'স্ত্ৰী শিক্ষা:অতীত অাৰু বৰ্তমান','ডাইনী হত্যাকাণ্ড:এক সামাজিক ব্যাধি' অাদিৰ দৰে প্ৰৱন্ধৰ বিষয়বস্তু তেনেই নতুন নহয় যদিও চিন্তাৰ একোটা নতুন দিগন্ত উন্মোচিত কৰিছে।নতুন প্ৰজন্মৰ মানসিকতাত দেখা দিয়া কুসংস্কাৰ বিৰুধী মনোভাৱৰ প্ৰতিফলন ঘটা দেখা গৈছে অাৰু দুটামান প্ৰৱন্ধতো।সেইদৰে সোনোৱাল-কছাৰীসমাজত প্ৰচলিত পৰম্পৰাগত হুঁচৰি গীত সমূহৰ চমু বিৱৰণ অাৰু মৰাণ জনগোষ্ঠীৰ লোক -উৎসৱ ৰাতিবিহু সম্পৰ্কে লিখা প্ৰৱন্ধয়ো  অসমীয়া সংস্কৃতিৰ যথেষ্ট দিশ অালোকপাত কৰিছে।'ৰোমন্থণ' শিতানত ডুমডুমা মহাবিদ্যালয়- অালোচনীৰ প্ৰথম গৰাকী সম্পাদক প্ৰকাশ নাৰায়ণ পাটোৱাৰীয়ে অালোচনীখনৰ প্ৰকাশৰ ক্ষেত্ৰত লাভ কৰা নানা অালৈ-অাহুকালৰ কথা উল্লেখ কৰাৰ লগতে অতীতৰ বহু তথ্য দাঙি ধৰিছে।তেওঁৰ প্ৰৱন্ধটোৰ সৈতে প্ৰকাশিত ১৯৭০-৭১ চনৰ ছাত্ৰ একতা সভাৰ স্থিৰচিত্ৰ খনি এক অাপুৰুগীয়া সম্পদ।স্থিৰচিত্ৰখনিত সেই সময়ৰ অধ্যক্ষ ৰায়হান শ্বাহদেৱক দেখিবলৈ পোৱা গৈছে।অালোচনীখনত প্ৰকাশিত 'প্ৰান্তিক অালোচনীৰ সামগ্ৰিক অালোচনা' , 'মিৰি জীয়ৰী উপন্যাসৰ এটি পৰ্যালোচনা' ,অাদি অন্যতম উল্লেখযোগ্য সংযোজন।অধ্যক্ষ ড:প্ৰকাশজ্যোতি বৰঠাকুৰে তেখেতৰ চীন দেশ ভ্ৰমণ সম্পৰ্কে অালোচনীখনৰ তত্বাৱধায়িকা হিৰণ বৈশ্য দত্তক দিয়া সাক্ষাৎকাৰেটিয়েও যথেষ্ট তথ্য দাঙি ধৰিছে।
         ছাত্ৰ-ছাত্ৰী সকলৰ মৌলিক অাৰু সৃষ্টিশীল ৰচনাসমূহৰ ভিতৰত স্নাতক মহলাৰ ছাত্ৰ ঘনকান্ত মৰাণৰ দ্বাৰা ৰচিত 'নিয়তিৰ পৰিহাস' এখনি সুন্দৰ নাটক।সেইদৰে অন্ধবিশ্বাসৰ বিৰুদ্ধে প্ৰতিবাদ সাব্যস্ত কৰি লিখা প্ৰিন্স ভৰালীৰ উপন্যাসিকা 'সৰুপোণা' ৰ লগতে মৃদুল মৰাণ,কৰিশ্মা নেওগ অাৰু পিঞ্জু মৰাণৰ গল্পত বিষয়বস্তৰ বৈচিত্ৰ অাৰু গভীৰতাৰ অভাৱ থকা স্বত্ত্বেও সুন্দৰ কথন শৈলী অাৰু বাক্যসজ্জা পৰিলক্ষিত হৈছে।কবিতাৰ সম্পৰ্কত ক'বলৈ গলে এই কথা স্বীকাৰ কৰিবই লাগিব যে এইসংখ্যাত যথেষ্ট সংখ্যক সুন্দৰ কৱিতা ছাত্ৰ-ছাত্ৰীসকলে লিখা অামাৰ চকুত পৰিছে।বিশেষকৈ অংকুৰ জ্যোতি তামুলী(হেৰুৱাৰ কথা নাছিল বসন্তৰ প্ৰথমজাক বৰষুণ),নিবেদিতা দাস(শাওণ),প্ৰাঞ্জল চাৰিঙ্গীয়া ফুকন(বকুল,তুমি অাৰু কবিতা)ৰ কৱিতাত অাধুনিক কৱিতাৰ নিৰ্মান 8শৈলী মন কৰিবলগীয়া।নিৰলস চৰ্চা অব্যাহত থাকিলে এইসকল কৱিৰ নিৰ্মানশৈলী অাৰু  চিন্তাই পৰিপক্কতা লাভ কৰিব বুলি অাশা কৰিব পাৰি।
      অালোচনীখনৰ ইংৰাজী বিভাগ অলংকৃত কৰিছে অতিথি লেখক ড:হীৰেণ গোহাঁইৰ  Why Higher Education?  শীৰ্ষক প্ৰৱন্ধটিয়ে।শিক্ষাবিষয়ক অান এটি প্ৰৱন্ধ লিখিছে দীপাংকৰ বৰ্মণে,কম্পিউটাৰৰ ইতিহাস সম্পৰ্কে লিখিছে মনালিচা দত্তই,গোলকীয় উত্তাপৰ বিষয়ে লিখিছে ৰবিশংকৰ মৰাণে,মংগল গ্ৰহৰ বিষয়ে লিখিছে সঞ্জীৱ চক্ৰৱৰ্তীয়ে।স্নাতক মহলাৰ ছাত্ৰী পল্লৱী ডেকাই লিখা  Educatinal status of Tea-Garden workers:A study on Hapjan Block of Tinsukia District  শীৰ্ষক প্ৰৱন্ধটি যথেষ্ট তথ্যপূৰ্ণ অাৰু সময় সাপেক্ষ হৈছে বুলি ক'ব পাৰি।মৌলিক সৃষ্টি হিচাপে গুণকান্ত ঘোৰাচোৱাৰ  A live stone  শীৰ্ষক কৱিতাটিৰ নিৰ্মান শৈলী অাৰু বিষয়বস্তুৰ নতুনত্ব দেখি ভাল লাগিল।স্নাতক মহলাৰ ছাত্ৰী মাৰ্টিনা গগৈয়ে অনুবাদ কৰা কৱি মহেন্দ্ৰ বৰাৰ কৱিতাটিও এক সুন্দৰ সংযোজন।
     সাহিত্য একাদেমীৰ অধ্যক্ষ ড:বিশ্বনাথ প্ৰসাদ তিৱাৰীয়ে লিখা বিশেষ নিৱন্ধটিয়ে অালোচনীখনৰ হিন্দী বিভাগ অলংকৃত কৰিছে।লক্ষীনাথ বেজবৰুৱাৰ গল্প এটিৰ সুনীল প্ৰসাদে কৰা হিন্দী অনুবাদটিও সুন্দৰ হৈছে।কৱিতাৰ শিতানত ৰশ্মি কুমাৰী অাৰু দুৰ্গা কুমাৰীয়ে লিখা কৱিতা দুটা সুন্দৰ হৈছে।দুয়ো গৰাকী কৱিয়ে কৱিতাদুটাৰ বিষয়বস্তু ক্ৰমে মাতৃ অাৰু কন্যা সন্তানৰ হৃদয়স্পৰ্শী চিত্ৰ অংকিত কৰিছে। সেইদৰে অালোচনীখনৰ বাংলা বিভাগটোতো সন্নিবিষ্ট হৈছে কেইবাটাও গুৰুত্বপূৰ্ণ লেখা।বাংলা বিভাগৰ এচ'চিয়েট প্ৰফেচাৰ ড: মন্দিৰা দাসে লিখা 'কামাখ্যাশংকৰ গুহ ও ৰবীন্দ্ৰ নাথ' ,ছাত্ৰী জয়া দাসে কৰা ড: ভৱেন্দ্ৰ নাথ শইকীয়াৰ গল্পৰ অনুবাদ 'মিনতি' অাৰু সুস্মিতা দেবে লিখা 'বন্যপ্ৰাণী সংৰক্ষণ 'এই ক্ষেত্ৰত উল্লেখযোগ্য।তাৰোপৰি এই বিভাগত সন্নিবিষ্ট হৈছে দক্ষিন ভাৰত ভ্ৰমণৰো এটি কাহিনী।
      অালোচনীখনৰ মানদণ্ড অাৰু সৌষ্ঠৱ বৃদ্ধিৰ ক্ষেত্ৰত অৰিহণা যোগোৱা অন্যান্য উপাদান কেইটামান হৈছে- ৰাষ্ট্ৰীয় সেয়া অাচঁনি গোটৰ বিশেষ শিবিৰৰ কাৰ্যসূচী,ছাত্ৰ একতা সভাৰ বিভাগীয় সম্পাদক সকলৰ প্ৰতিবেদন,বাৰ্ষিক ক্ৰীড়া সপ্তাহৰ ৰেঙনি,শ্ৰদ্ধাঞ্জলি পৃষ্ঠা,ৰেখাচিত্ৰ,গৌৰৱময় মুহূৰ্ত সমূহৰ অালোকচিত্ৰ অাৰু  শিক্ষাৰ লক্ষ অাৰু অাদৰ্শৰ বিষয়ে চমু অালোকপাত কৰি লিখা 'সম্পাদকীয়'পৃষ্ঠা।  বৰ্ণ-বিভ্ৰাত বা   ছপাশালৰ কাৰিকৰী ত্ৰুটী-বিচ্যুতিও সততে চকুত নপৰাকৈ এই সংখ্যাটি সুন্দৰকৈ মুদ্ৰণ কৰি উলিয়াইছে ডুমডুমাৰ গুণাৰাম প্ৰেছে।
(লেখকৰ ফোন নাম্বাৰ ৯৯৫৪২৪৯৯১৬)
(দৈনিক জনমভূমিৰ 'প্ৰান্তৰ'ত প্ৰকাশিত)