ড্যান ব্ৰাউনৰ বিতৰ্কিত উপন্যাস :দ্য ডা ভিঞ্চি ক'ড-

 ড্যান ব্ৰাউনৰ বিতৰ্কিত উপন্যাস :দ্য ডা ভিঞ্চি ক'ড--

                                                    -বীৰ্কে বি.থাপা

     প্ৰখ্যাত আমেৰিকান উপন্যাসিক ড্যান ব্ৰাউন(Dan Browne) ৰ 2003 চনত প্ৰকাশিত 'দ্য ডা ভিঞ্চি ক'ড '(The da Vinci code) এখন প্ৰবল বিতৰ্ক সৃষ্টিকাৰী উপন্যাস।উপন্যাসখনে

প্ৰবল বিতৰ্কৰ সৃষ্টি কৰাৰ মূলতে হ'ল -ড্যান ব্ৰাউনে উপন্যাসখনৰ জৰিয়তে প্ৰকৃততে প্ৰকাশ কৰিবলৈ চেষ্টা কৰিছে খৃষ্টীয় ধৰ্মজগতৰ বিশ্বাসৰ পৰিপন্থী কেতবোৰ গোপন আৰু চাঞ্চল্যকৰ তথ্য।

     পেৰিচৰ বিশ্ববিখ্যাত মিউজিয়াম লুভ ( Louvre)ত সংঘটিত হোৱা এটি হত্যাকাণ্ডৰ ঘটনাৰে উপন্যাসখন আৰম্ভ হৈছে।মিউজিয়ামৰ 76 বছৰীয়া বৃদ্ধ কিউৰেটৰ ঝাঁক ছ'লিয়েৰক সন্ধাৰ নিৰ্জনতাত আহি কোনোবা আততায়ীয়ে গুলীয়াই হত্যা কৰাৰ পাছতে ফৰাচী পুলিচ তৎপৰ হৈ পৰিছে আততায়ীক কৰায়ত্ব কৰিবলৈ।আততায়ীৰ গুলীত শেষ নিশ্বাস ত্যাগ কৰাৰ আগমুহূৰ্তৎ মৃত ঝাঁক ছ'নিয়ৰে মজিয়াৰ ওপৰত লিখি থৈ যোৱা কেইশাৰীমান অবোধগম্য সাংকেতিক ভাষাৰ আঁত ধৰি ফৰাচী পুলিচে সন্দেহবশত: কৰায়ত্ব কৰিছে হাৱাৰ্ড বিশ্ববিদ্যালয়ৰ বিখ্যাত প্ৰতীক তত্ববিদ অধ্যাপক ৰবাৰ্ট লেংডনক।প্রকৃততে ঝাঁক ছ'নিয়েৰৰ সৈতে ৰবাৰ্ট লেংডনৰ কোনো সম্পৰ্ক বা ব্যক্তিগত পৰিচয় নাছিল।প্রাচীন প্রতীকতত্ব সম্পৰ্কে পেৰিচলৈ বক্তৃতা প্ৰদান কৰিবলৈ অহা লেংডনক ঝাঁক ছ'নিয়ৰে অৱশ্যে কোনো এক বিশেষ জৰুৰী বিষয়ত আলোচনা কৰিবৰ বাবে সেই নিশা সাক্ষাতৰ অনুমতি বিচাৰিছিল।সেই সূত্ৰে তেওঁ ঝাঁক ছ'নিয়েৰক হোটেল ৰিৎসলৈ মাতি পঠিয়াইছিল।কিন্তু বহু সময় অপেক্ষা কৰাৰ পাছতো তেওঁ অহা নাছিল।তাৰ পৰিৱৰ্তে ফৰাচী পুলিচে আহি ছ'নিয়েৰৰ হত্যাৰ খবৰ দিয়াত তেওঁ স্বাভাৱিকতে আচৰিত হৈছিল।

     খবৰ পায়েই ৰবাৰ্ট লেংডন পুলিচৰ সৈতে লুভ মিউজিয়ামৰ সেই বিশেষ কোঠাটোলৈ আহিল য'ত ছ'নিয়েৰৰ মৃতদেহ পৰি আছিল।

     মজিয়াৰ ওপৰত পৰি থকা ঝাঁক ছ'নিয়েৰৰ মৃতদেহটো পৰ্যৱেক্ষণ কৰি তেওঁ দেখিলে-মৃত্যুৰ আগমুহূৰ্তৎ ছ'নিয়ৰে তেওঁৰ শৰীৰৰ সমস্ত কাপোৰ সোলোকাই সম্পূৰ্ণ উলংগ হৈ পৰিছিল আৰু গুলীবিদ্ধ শৰীৰৰ পৰা ওলোৱা তেজেৰে নিজৰ পেটৰ ওপৰত,ঠিক নাভিমণ্ডলত অংকিত কৰিছিল এটা পাঁচকোণীয়া তৰা (Pentacle)ৰ চিহ্ন।প্ৰতীকতত্বৰ দৃষ্টিৰে তেওঁ ঝাঁক ছ'নিয়েৰৰ উলংগ শৰীৰ,পাঁচকোণীয়া তৰাৰ চিহ্ন আদিৰ তাৎপৰ্য উদ্ধাৰ কৰিবলৈ চেষ্টা কৰিলে।প্রাথমিকভাৱে তেওঁ এই কথাত নিশ্চিত হ'ল যে এই পেন্টাকলৰ চিহ্নটো হৈছে প্ৰকৃততে প্ৰাচীন প্ৰকৃতিবাদী উপাসনা ধৰ্ম(Pagan Religion) ৰ এটা ধৰ্মীয় প্ৰতীক।কিন্তু মৃত্যুৰ আগমুহূৰ্তৎ শৰীৰৰ সমস্ত কাপোৰ সোলোকাই নিজৰ নগ্ন শৰীৰত এজন কেথলিক পুৰুহিতে প্ৰাচীন ধৰ্মীয় প্ৰতীক স্বৰূপ এই পেন্টাকলৰ চিহ্ন অংকিত কৰি প্ৰকৃততে কি প্ৰকাশ কৰিব খুজিছিল?মৃত ছ'নিয়ৰে তেজৰ আঙুলিৰে মজিয়াৰ ওপৰত লিখা O,Draconian Devil, Oh Lame Saint আদি কথাবোৰৰ একো অৰ্থ তেওঁ উদ্ধাৰ কৰিব নোৱাৰিলে।

     ৰবাৰ্ট লেংডনে ফৰাচী পুলিচ অফিচাৰজনৰ সৈতে এই বিষয়ে কথা পাতি থকা সময়তে সাংকেতিক ভাষা বিশেষজ্ঞ ছ'ফি নেভিও নামৰ যুৱতীগৰাকীৰ প্ৰৱেশ।

    ইতিমধ্যই ৰবাৰ্ট লেংডন ফৰাচী পুলিচৰ হাতত বন্দী হৈ পৰিছিল।এই কথা কিন্তু তেওঁ ইমানপৰে তৰ্কিবই পৰা নাছিল। পুলিচ অফিচাৰজনৰ অলক্ষিতে ছ'ফি নেভিওৱে লেংডনক এই কথা জনাই দি তৎমুহূৰ্ততে তেওঁক তাৰ পৰা সংগোপনে আঁতৰাই লৈ আহিল।

     ছ'ফি নেভিওৰ তৎপৰতাত ৰবাৰ্ট লেংডন ফৰাচী পুলিচৰ হাতৰ পৰা পলাবলৈ সক্ষম হ'ল।পুলিচৰ হাতত ধৰা পৰাৰ পৰা ৰক্ষা পাবলৈ দুয়ো এখন ঠাইৰ পৰা আন এখন ঠাইলৈ পলাই ফুৰিবলৈ ধৰিলে।কিন্তু তাৰ লগে লগে তেওঁলোকে চলাই গ'ল আন এক ঐতিহাসিক অনুসন্ধান।

     শেষ পৰ্যন্ত ঝাঁক ছ'নিয়েৰৰ হত্যাকাৰী হিচাপে ওলাল খৃষ্টান কেথলিক ধৰ্মৰ সৈতে সম্পৰ্কিত 'অ'পাচ ডে'(Opus Dei) নামৰ ধৰ্মীয় উগ্ৰপন্থী সংগঠন এটাৰ মূৰব্বী।এতিয়া প্ৰশ্ন হ'ল,ধৰ্মীয় সংগঠনৰ সৈতে জড়িত খৃষ্টান ধৰ্মৰ এগৰাকী মূৰব্বীয়ে আন এগৰাকী কেথলিক পুৰুহিতক হত্যা কৰাৰ অন্তৰালত কি কাৰণ থাকিব পাৰে?এই প্ৰশ্নৰ উত্তৰ হিচাপে উপন্যাসিক ড্যান ব্ৰাউনে যি কাৰণ ব্যাখ্যা কৰিছে সেয়া তেনেই অবিশ্বসনীয় ,কিন্তু প্ৰমানিক।

     কাহিনীয়েই উপন্যাসখনৰ প্ৰধান বৈশিষ্ট্য নহয়।উপন্যাসখনৰ কাহিনীৰ স্বাৰ্থত ড্যান ব্ৰাউনে কিছু কাল্পনিক চৰিত্ৰ,ঘটনা আৰু পৰিৱেশৰ উপস্থাপন কৰিছে যদিও উপন্যাসখনত উত্থাপিত তথ্যসমূহৰ প্ৰামানিকতা নথকা নহয়।বিশ্বৰ বিভিন্ন দেশৰ সংগ্ৰহালয়, গীৰ্জা, সমাধিস্থল, গ্ৰন্থাগাৰ আদি চলাথ কৰি এক গভীৰ ঐতিহাসিক অনুসন্ধান আৰু গৱেষণামূলক অধ্যয়নেৰে ড্যান ব্ৰাউনে উপন্যাসখনত ইতিহাসত লিপিবদ্ধ নোহোৱা বহু গোপন আৰু চাঞ্চল্যকৰ তথ্য প্ৰকাশ কৰিছে।

       ফৰাচী পুলিচৰ হাতৰ পৰা পলাই ফুৰা ৰবাৰ্ট লংডন আৰু ছ'ফি নেভিওৱে অনুসন্ধানৰ অপৰিসীম কষ্টকৰ পথেৰে আগবাঢ়ি গৈএইবাৰ পেৰিচৰ লুভ মিউজিয়ামৰ বৃহৎ আর্ট গেলেৰীত গোপনে প্ৰৱেশ কৰি উদ্ধাৰ কৰিলে লিওনাৰ্ডো ডা ভিঞ্চিৰ 'মেড'না অফ দা ৰক্ ' নামৰ বিখ্যাত পেইণ্টিংখনৰ আঁৰত ঝাঁক ছ'নিয়ৰে লুকুৱাই ৰখা গোলাপৰ চিহ্ন অংকিত এপাত চাবি।গোলাপৰ চিহ্ন প্ৰাইয়ৰী অফ চিয়'ন' (Priory of Sion) নামৰ গোপন সংগঠন এটাৰ প্ৰতীক।সেই চাবিপাতেৰেই তেওঁলোকে Depository Bank of Zurichৰ এক গোপন ল'কাৰত লুকুৱাই ৰখা এটা সৰু বাকচ উদ্ধাৰ কৰিবলৈ সক্ষম হ'ল।

     ইমানখিনিলৈকে এই কথা স্পষ্ট হৈ পৰিল যে 'প্ৰাইয়ৰী অফ চিয়ন' নামৰ গোপন সংগঠন এচাৰ সৈতে ঝাঁক ছ'নিয়েৰৰ সম্পৰ্ক আছিল।কিন্তু কি এই সংগঠন? অমুসন্ধান কালত ৰবাৰ্ট লেংডনে এই তথ্যও আৱিস্কাৰ কৰিলে যে সংগঠনটোৰ জন্ম হৈছিল জেৰুজালেমত1099 চনত।তেতিয়াৰে পৰাই খৃষ্টান ধৰ্ম সম্পৰ্কীয় কিছুমান গোপন তথ্য (Sangreal documents) সংগঠনটোৱে যুগ যুগ ধৰি সংৰক্ষন কৰি আহিছিল।এই গোপন তথ্যবোৰ কেথলিক ধৰ্ম বিশ্বাসৰ পৰিপন্থী হোৱা হেতুকে কেথলিক গীৰ্জাসমূহে সম্ৰাট কষ্টেনটাইনৰ দিনৰে পৰা নিজৰ হাতলৈ আনিবলৈ বা ধ্বংস কৰি পেলাবলৈ চেষ্টা কৰিছিল।প্রথমাৱস্থাত এই তথ্যবোৰ হিৰোডৰ মন্দিৰৰ তলত পুতি থোৱা হৈছিল।পাছলৈ এখন ছাইৰ পৰা আন এখন ঠাইলৈ গোপনে স্থানান্তৰিত কৰা হৈছিল।

     উপন্যাসখনত উল্লেখিত এক চাঞ্চল্যকৰ তথ্য এয়ে যে বিশ্ববিখ্যাত চিত্ৰকৰ বত্তিচেলি, লিওনাৰ্ডো ডা ভিঞ্চি ,ৰাফেলৰ পৰা আৰম্ভ কৰি সপ্তদশ শতিকাৰ বৃটিছ বিজ্ঞানী নিউটন, উনবিংশ শতিকাৰ ফৰাচী লেখক ভিক্তৰ হিউগো আদিৰ দৰে ব্যক্তিও বিভিন্ন সময়ত 'চিয়ন'ৰ দৰে গোপন সংগঠনৰ 'গ্ৰেণ্ড মাষ্টাৰ ' আছিল।ৰবাৰ্ট লেংডনৰ ঐতিহাসিক অনুসন্ধানত এই কথাও উদ্ঘাটিত হ'ল যে 'চিয়ন'ৰ সদস্যসকলে প্ৰাচীন প্ৰকৃতিবাদী ধৰ্মৰ উপাসনা পদ্ধতিত গভীৰ আস্থা ৰাখিছিল আৰু সেই সূত্ৰেই ঝাঁক ছ'নিয়েৰেও জীৱনৰ অন্তিম সময়ত শৰীৰৰ সমস্ত কাপোৰ সোলোকাই উলংগ হৈ নাভিমণ্ডলৰ ওপৰত প্ৰাচীন প্ৰকৃতিবাদী উপাসনা ধৰ্মৰ ধৰ্মীয় প্ৰতীক পেণ্টাকলৰ চিহ্ন অংকিত কৰিছিল।

     আধুনিক সভ্য সমাজত প্ৰাচীন প্ৰকৃতিবাদী উপাসনা ধৰ্মক 'চয়তানৰ পূজা'(Devil's worship) আখ্যা দিয়া হয় যদিও খৃষ্টান ধৰ্ম প্ৰৱৰ্তনৰ পূৰ্বে পৃথিৱীৰ বিভিন্ন প্ৰান্তত এই ধৰ্মৰ সুকীয়া মৰ্যাদা আৰু তাৎপৰ্য আছিল।প্রাচীন মিচৰ,ইজিপ্ত, বেবিলন আদিৰ সভ্যতালৈকে এই ধৰ্ম বিস্তৃত হৈ আছিল।পৌত্তলিক উপাসনাৰ এই আদিম ধৰ্মত দেৱী আইচিছক 'মাতৃ-দেৱী' (Mother Goddess) ৰূপে উপাসনা কৰা হৈছিল।

     খৃষ্টান ধৰ্ম প্ৰৱৰ্তন হোৱাৰ পূৰ্বেই প্ৰাচীন প্ৰকৃতিবাদী উপাসনা ধৰ্ম বিলুপ্ত হৈ গৈছিল।প্ৰকৃততে ৰোমান সম্ৰাট কনষ্টেনটাইনৰ দিনৰ পৰা এই ধৰ্মক বিলুপ্ত কৰিবলৈ চেষ্টা কৰা হৈছিল।

     প্ৰকৃতিবাদী উপাসনা ধৰ্মত দেৱী আইচিছক উপাসনা কৰা ৰীতিৰ পৰা প্ৰমাণ হয় যে খৃষ্টান ধৰ্ম প্ৰৱৰ্তন হোৱাৰ পূৰ্বে নাৰীৰ স্থান আছিল অতি উচ্চ।কিন্তু কেথলিক গীৰ্জাসমূহে নিজৰ পুৰুষসুলভ স্বাৰ্থত নাৰীক দমন কৰি ৰাখিবলৈ চেষ্টা কৰিছিল যাৰ ফলস্বৰূপে খৃষ্টান ধৰ্মৰ প্ৰৱৰ্তক যীচুৰ জীৱন প্ৰভাৱিত কৰা দুগৰাকী নাৰী ক্ৰমে মাতৃ মেৰী আৰু যীচুৰ শিষ্যা মেৰী মেগডেলেনৰ স্থান তেনেই গৌণ হৈ পৰিছিল।মেৰী মেগডেলেনক বাইবেলত বৰ্ণনা কৰা হৈছিল কেৱল এগৰাকী বেশ্যাৰ ৰূপত।তাৰোপৰি তেজ-মঙহৰ মানৱ সন্তান যীচুক 'ঈশ্বৰ পুত্ৰ' ৰূপে প্ৰকাশ কৰিব বিচৰা খৃষ্টান পুৰুহিতসকলে যীচুৰ মানৱীয় গুণ বা বৈশিষ্ট্যসমূহক জন-মানসৰ দৃষ্টিৰ পৰা আঁতৰাই ৰখাৰ উদ্দেশ্যে বাইবেলত অন্তৰ্ভুক্ত কৰিছিল অলেখ অলৌকিক কাহিনী।অকল সেয়ে নহয়,গীৰ্জাৰ স্বাৰ্থৰ পৰিপন্থী বহু অংশ বাইবেলৰপৰা পৰা আঁতৰাই পৰ্যন্ত ৰখা হৈছিল।

     'প্রাইয়ৰী অফ চিয়ন' নামৰ সংগঠনটোৱে খৃষ্টান ধৰ্মক পুনৰ পূৰ্বৰ ৰূপত প্ৰতিষ্ঠা কৰিবলৈ আৰু তাৰ লগে লগে যীচুৰ জীৱন সম্পৰ্কীয় কিছু সত্যক পোহৰলৈ অনাৰ উদ্দেশ্যে জীৱন পণ ত্যাগ কৰি গৈছিল।লুভ মিউজিয়ামত আততায়ীৰ গুলীত প্ৰাণ ত্যাগ কৰা ঝাঁক ছ'নিয়েৰ বাহ্যিক দৃষ্টিত কেথলিক গীৰ্জাৰ পুৰুহিত আছিল যদিও তেওঁ কিন্তু গোপনে প্ৰকৃতিবাদী উপাসনা ধৰ্মৰ উপাসক আছিল আৰু 'চিয়ন'নামৰ সংগঠনটোৰো মূৰব্বী আছিল।

     উল্লেখযোগ্য যে ফৰাচী পুলিচ বাহিনীৰ হাতৰ পৰা উদ্ধাৰ কৰি ৰবাৰ্ট লেংডনক পলুৱাই অনা ছ'ফি নেভিও নামৰ সাংকেতিক ভাষা বিশেষজ্ঞ গৰাকী আছিল মৃত ঝাঁক ছ'নিয়েৰৰ নাতিনীয়েক।ছ'নিয়েৰৰ গোপন ধৰ্ম সম্পৰ্কে ছ'ফিয়েও প্রথমে বিশেষ একো গম পোৱা নাছিল।অক্সফৰ্ডত পঢ়ি থকা অৱস্থাত এবাৰ ককাকক লগ কৰিবলৈ আহি গীৰ্জাৰ এক গোপন অনুষ্ঠানত তাই প্ৰত্যক্ষ কৰিছিল এক অনাকাংক্ষিত দৃশ্য।সেই দৃশ্যই ককাকৰ প্ৰতি তাইৰ মনত তীব্ৰ ঘৃণা আৰু বিতৃষ্ণাৰ সৃষ্টি কৰিছিল।সেই গোপন অনুষ্ঠানত তাই দেখিছিল-মুখত মাস্ক পৰিধান কৰা কিছু সংখ্যক নাৰী আৰু পুৰুষ সম্পূৰ্ণ নগ্নাৱস্থাৰে মুক্ত যৌনাচাৰত লিপ্ত হৈ আছিল।সেই দৃশ্য দেখি তাই হতবাক হৈ পৰিছিল আৰু ককাকৰ সৈতে সকলো সম্পৰ্ক ছিন্ন কৰি আঁতৰি গৈছিল।কিন্তু প্রাচীন প্রকৃতিবাদী উপাসনা ধৰ্ম সম্পৰ্কে সবিশেষ অধ্যয়ন কৰাৰ পাছত ককাকৰ প্ৰতি থকা তাইৰ মনৰ সকলো ঘৃণা আঁতৰি গৈছিল।

     ডেপ'জিটৰী বেংক অফ জুৰিখৰ পৰা উদ্ধাৰ কৰা বাকচৰ ভিতৰত ৰবাৰ্ট লেংডন আৰু ছ'ফিয়ে কিছুমান সাংকেতিক ভাষাৰে লিখা পাঠ(Cryptext) আৱিস্কাৰ কৰিলে।এই সাংকেতিক ভাষাৰ অৰ্থ সহজবোধগম্য নাছিল।সেয়ে তেওঁলোকে এইবাৰ সাক্ষাৎ কৰিলে আন এগৰাকী বৃটিছ ইতিহাসবিদ লী টিবিঙক।খৃষ্টীয় ধৰ্ম বিশ্বাসৰ চিৰন্তন ৰহস্য 'হোলী গ্ৰেইল'(Holy Grail) ৰ অধ্যয়ন আৰু অনুসন্ধানত সমস্ত জীৱন অতিবাহিত কৰা এইগৰাকী ইতিহাসবিদৰ সহায়ত তেওঁলোকে প্ৰাচীন প্ৰকৃতিবাদী উপাসনা ধৰ্ম,যীচুৰ জীৱন প্ৰভাৱিত কৰা মেৰী মেগডেলেন,কেথলিক গীৰ্জাসমূহৰ ধৰ্মীয় কু-চক্ৰান্ত আৰু অনৈতিক কাৰ্যাৱলী আদিৰ সম্পৰ্কত বহু তথ্য আৱিস্কাৰ কৰিবলৈ সক্ষম হ'ল।

      লী টিবিঙে তেওঁৰ প্ৰকাণ্ড গ্ৰন্থাগাৰৰ পৰা বিভিন্ন কিতাপ উলিয়াই ফিলিপে লিখা গস্পেল(Gospel)ৰ সেই অংশবোৰ দেখুৱালে য'ত যীচুৰ সৈতে মেৰী মেগডেলেনৰ প্ৰেম আৰু যৌন সম্পৰ্কৰ কথা লিখা আছিল।ফিলিপৰ দ্বাৰা লিখিত Gospel ৰ উদ্ধৃতি দি তেওঁ ক'লে-'Christ loved her more than all the disciples and used to kiss often on her mouth. The rest of the disciples were offended by it. ' অকল সেয়ে নহয়,যীচুৱে তেওঁৰ গীৰ্জা ভৱিষ্যতে নাৰীৰ দ্বাৰা পৰিচালিত হোৱাটো বিচাৰিছিল।তেওঁ গম পাইছিল যে তেওঁক ক্ৰুচত দিয়া হ'ব।সেয়ে মেৰী মেগডেলেনক গীৰ্জা পৰিচালনা কৰিবলৈ তেওঁ নিৰ্দেশ দিছিল।আশ্বর্যজনক কথা এই যে যীচুক ক্ৰুচত দিয়াৰ সময়ত মেৰীৰ গৰ্ভত থিত লৈছিলহি যীচুৰ সন্তানে।

      মেথিওৰ পুস্তকত এই কথাৰো উল্লেখ আছে যে যীচুৰ জন্ম হৈছিল ইহুদীসকলৰ ৰজা চল'মন আৰু ডেভিদৰ বংশত।তেনেদৰে মেৰী মেগডেলেনৰ জন্মও হৈছিল সম্ভ্ৰান্ত বংশত।লী টিবিঙে এই সম্পর্কৰ কথা উল্লেখ কৰি ক'লে-'By marrying into a powerful house of Benjamin, Jesus fused two royal bloodlines, creating a potent of political union with the potential of making a legitimate claim to the throne and restoring the line of kings as it was under Solomon. '

      লী টিবিঙৰ মতে,যীচুক ক্ৰুচত দিয়াৰ সময়ত তেওঁৰ সন্তানক ৰক্ষা কৰিবৰ বাবে গৰ্ভৱতী মেৰী ফ্ৰাঞ্চলৈ পলাই যায় যোচেফ আৰিমিথিয়াৰ সহায়ত।তাত ইহুদী সকলৰ আশ্ৰয়ত থাকি তেওঁ কন্যা সন্তান এজনী জন্ম দিছিল।সন্তাটিৰ নাম আছিল ছাৰাহ।ফ্রাঞ্চৰ ইহুদীসকলে মেৰী আৰু তেওঁৰ সন্তানক কেথলিক গীৰ্জাৰ কোপদৃষ্টিৰ পৰা ৰক্ষা কৰিবলৈ জীৱন পণ চেষ্টা কৰিছিল।কাৰণ ,পোপৰ ক্ৰমবৰ্ধমান ক্ষমতা আৰু প্ৰতিপত্তিৰ বাবে যীচুৰ বংশধৰ আছিল প্ৰবল ভাবুকি স্বৰূপ ।

     খৃষ্টীয় ধৰ্ম বিশ্বাসৰ ' হ'লি গ্ৰেইল'ৰ প্ৰতীকি তাৎপৰ্যৰ কথা উল্লেখ কৰি বৃটিচ ইতিহাসবিদ টিবিঙে কয়-The legend of the Holy Grail is a legend about royal blood when Grail legend speaks of the 'chalice' that held the blood of Christ... It speaks, in fact, of Mary Magdalane-the female womb that carried Jesus' royal bloodline. -অৰ্থাৎ পবিত্ৰ কাপ বা পিয়লাৰ ধাৰণাটো প্ৰকৃততে মেৰী মেগডেলেনৰ সেই পবিত্ৰ গৰ্ভৰ প্ৰতীক যি গৰ্ভত তেওঁ ধাৰণ কৰিছিল যীচুৰ তেজ বা বীৰ্য।অকল সেয়ে নহয়,মেৰীক বুজাবলৈ 'The Chalice', The Rose'আদি শব্দও বিভিন্ন সময়ত ব্যৱহাৰ কৰা হৈছিল।প্রাইয়ৰী অফ চিয়নে মেৰীক 'ডিভাইন মাদাৰ' ৰূপে উপাসনা কৰিছিল আৰু গোলাপ ফুলক তেওঁলোকৰ প্ৰতীকৰূপে ব্যৱহাৰ কৰিছিল।

      চিত্রশিল্প-জগতৰ এক বিস্ময়কৰ তথ্যও ড্যান ব্ৰাউনে উপন্যাসখনত উল্লেখ কৰিছে।প্ৰাইয়ৰী অফ চিয়নৰ 'গ্ৰেণ্ড মাষ্টাৰ' হিচাপে কাম কৰা মহান চিত্ৰকৰ ইটালীৰ লিওনাৰ্ডো ডা ভিঞ্চিয়ে তেওঁৰ অলেখ চিত্ৰৰ জৰিয়তে কিছুমান গোপন সত্য প্ৰকাশ কৰিবলৈ চেষ্টা কৰিছিল।তেওঁ প্ৰধানকৈ কেথলিক গীৰ্জাৰ বাবে ছবি আঁকিছিল যদিও কেথলিক ধৰ্ম বিশ্বাসৰ বিৰুদ্ধে 'মনালিচা'ৰ দৰে চিত্ৰত মানৱ শৰীৰত নাৰী আৰু পুৰুষ দুয়ো সত্বাৰ অৱস্থিতিক অত্যন্ত কলাত্মক ৰূপত অংকন কৰিছিল।বাইবেলত যীচুৰ আটাইকেইজন শিষ্যই পুৰুষ শিষ্য আছিল বুলি উল্লেখ থকা কথাষাৰৰ বিপৰীতে তেওঁ 'দ্য লাষ্ট চাপাৰ' নামৰ পেইণ্টিংখনত যীচুৰ সোঁহাতে এগৰাকী নাৰী শিষ্যাক অংকন কৰিছিল।এই নাৰী শিষ্যাগৰাকীয়েই আছিল মেৰী মেগডেলেন।চিত্রখন এনে কৌশলেৰে ভিঞ্চিয়ে অংকন কৰিছিল যে এই কথা বহু যুগলৈ কেথলিক গীৰ্জাসমূহৰ চকুতে পৰা নাছিল।

     পাঠকৰ মনত স্বাভাৱিকতে উদয় হোৱা এটা প্ৰশ্ন এয়াও হ'ব পাৰে যে ঝাঁক ছ'নিয়েৰৰ হত্যাকাণ্ডৰ সৈতে প্ৰাচীন প্ৰকৃতিবাদী উপাসনা ধৰ্ম,প্ৰাইয়ৰী অফ চিয়ন,ভিঞ্চিৰ চিত্ৰ আদিৰ কি সম্পৰ্ক ?এই প্ৰশ্নৰ উত্তৰ হিচাপে ডেন ব্ৰাউনে দেখুৱাইছে যে এই হত্যাকাণ্ড প্ৰকৃততে সংঘটিত কৰিছিল আমেৰিকাৰ অ'পাচ ডে (Opus Dei) নামৰ ধৰ্মীয় সংগঠন এটাৰ মূৰব্বী এগৰাকীয়ে।1928 চনত স্পেনিচ পুৰুহিত যচ্ মাৰিয়া এস্ক্ৰিভা(Josmaria Escrieva) নামৰ ব্যক্তি এগৰাকীয়ে গঢ়া এই সংগঠনৰ মুখ্য উদ্দেশ্য আছিল ৰংক্ষনশীল কেথলিক মূল্যবোধক পুনৰ প্ৰতিষ্ঠা কৰা।1934 চনত প্রকাশিত এস্ক্রিভাৰ ধৰ্মীয় গ্ৰন্থ The Wayৰ বাণীসমূহ সমগ্ৰ ইউৰোপতে বিয়পি পৰিছিল আৰু বিশ্বৰ বিভিন্ন প্ৰান্তত প্ৰায় বিয়াল্লিছটা ভাষাত এই গ্ৰন্থ অনুবাদ হৈছিল।

     বিপুল জনপ্ৰিয়তাই Opus Deiৰ মূৰব্বী পদাধিকাৰীসকলক পাছলৈ অজস্ৰ ধন-সম্পদ আৰু বিলাসী জীৱনৰ অধিকাৰী কৰি তুলিছিল।নিজৰ নিৰাপত্তাৰ স্বাৰ্থত স্বয়ং পোপেও এই সংগঠনক সমৰ্থন কৰিছিল যদিও পাছলৈ সমৰ্থন প্ৰত্যাহাৰ কৰাত সংগঠনটোৰ নেতৃত্বত থকা মূৰব্বী পদাধিকাৰীসকল অনিশ্চয়তাত ভূগিবলগীয়া হৈছিল।এনে পৰিস্থিতিত তেওঁলোকে হেৰুৱা ক্ষমতা পুনৰ উদ্ধাৰ কৰাৰ মানসিকতাৰে 'প্ৰাইয়ৰী অফ চিয়ন'ৰ দ্বাৰা সংৰক্ষিত গোপন তথ্যসমূহ নিজৰ হাতলৈ আনিবলৈ তৎপৰ হৈ উঠিছিল-যাৰ পৰিণাম স্বৰূপে তেওঁলোকে হত্যা কৰিছিল ঝাঁক ছ'নিয়েৰক।

     ছ'নিয়েৰক হত্যা কৰাৰ পাছত হত্যাকাৰীজনে ৰবাৰ্ট লেংডন আৰু ছ'ফি নেভিওৰ পাছ লোৱাত তেওঁলোকে লী টিবিঙৰ সহযোগত বিমান এখনেৰে পেৰিচৰ মাটি এৰি ইংলেণ্ডলৈ পলাই যায়।তেওঁলোকে পোৱা শেহতীয়া তথ্য অনুসৰি চিয়নৰ দ্বাৰা সংৰক্ষিত Sangreal document ইংলেণ্ডৰ মাটিত পুতি থোৱা আছে।

     ইংলেণ্ডত তেওঁলোকে 'গোপন তথ্য' উদ্ধাৰ কৰিব পাৰিলেনে?অনুসন্ধানৰ এই পৰ্যায়ত তেওঁলোক সোমাই পৰিল 'প্ৰতীক' , 'সাংকেতিক ভাষা ' আদিৰ ৰহস্যময় এক অন্ধকাৰ জগতত।Depository Bank Of Zurich ৰ পৰা উদ্ধাৰ কৰা বাকচ এটাৰ ভিতৰত আছিল অবোধগম্য সাংকেতিক ভাষাৰে লিখা কিছু Cryptext -তাৰে এটাত লিখা আছিল - ' In London lies a knight ,a Pope interred... His labor's fruit a holy wrath incurred, you seek the orb that ought be on his tomb. It speaks of Rosy flesh and seeded womb'-এই কথাখিনিৰ কোনো পোনপটীয়া অৰ্থ তেওঁলোকে উদ্ধাৰ কৰিব নোৱাৰিলে।বহু চেষ্টাৰ অন্তত তেওঁলোকে King's Collegeৰ Religious Department ৰ এগৰাকী গ্ৰন্থাগাৰিকৰ সহায়ত এই সন্দর্ভত বহু তথ্য উদ্ধাৰ কৰিবলৈ সক্ষম হ'ল।এই তথ্যৰ ভিত্তিত তেওঁলোকে ' নাইট '(Knight) উপাধিপ্ৰাপ্ত বিজ্ঞানী ছাৰ আইজাক নিউটনৰ West Minister Abbeyত থকা সমাধিস্থলত গৈ উপস্থিত হ'ল।বিভিন্ন দিশ সূক্ষ্মভাৱে পৰ্যৱেক্ষন কৰি তেওঁলোক এই সিদ্ধান্তত উপনীত হ'ল যে কেথলিক প্ৰভাৱমুক্ত কবি আলেকজেণ্ডাৰ পোপ নিউটনৰ বন্ধু আছিল আৰু তেওঁৰ পৌৰোহিত্যতে নিউটনক সমাধি দিয়া হৈছিল।ইয়াৰ লগে লগে 'His labor's fruit a Holy wrath incurred'-এই কথাষাৰৰ অৰ্থ স্পষ্ট হৈ পৰিল।কাৰণ বিজ্ঞানী নিউটনৰ বিজ্ঞানৰ চমকপ্ৰদ আৱিস্কাৰসমূহে কেথলিক ধৰ্ম-বিশ্বাসক অসন্তুষ্ট কৰিছিল।

     এইবাৰ ৰবাৰ্ট লেংডন আৰু ছ'ফি নেভিওৰ সন্মুখত আছিল আন এক প্ৰত্যাহ্বান।আন এক ৰহস্য উদ্ঘাটনৰ- 'You seek the orb that ought be on his tomb, it speaks Rosy flesh and seeded womb'.ঝাঁক ছ'নিয়েৰে উল্লেখ কৰা এই সাংকেতিক ভাষাৰ প্ৰকৃত অৰ্থৰ অন্বেষণত তেওঁলোকে নিউটনৰ সমাধি পুনৰ সূক্ষ্মভাৱে পৰ্যৱেক্ষন কৰিলে।নিউটনৰ সমাধিত বৃত্তাকাৰে (orb) অংকিত অলেখ গ্ৰহ-নক্ষত্ৰ,জ্যোতিৰ্মণ্ডল আদিৰ চিত্ৰ তেওঁলোকে দেখা পালে যদিও Rosy flesh and seeded wombৰ স্পষ্ট অৰ্থ উলিয়াব নোৱাৰিলে।প্রতীকতত্বৰ দৃষ্টিৰে এই সম্পৰ্কে ৰবাৰ্ট লেংডনে বহু ধাৰণাই কৰিলে।তেওঁৰ মতে,মৃত ছ'নিয়ৰে Rosy flesh শব্দদুটাৰে সেই আপেলটোৰ কথাই বুজাইছিল যি আপেল সৰা ঘটনাটোৰ পৰা নিউটনে তেওঁৰ বিখ্যাত মধ্যাকৰ্ষণৰ সূত্ৰ আৱিস্কাৰ কৰিছিল।আপেলসৰা পৰিঘটনাটোৰ সৈতে স্বৰ্গৰ পৰা অপসাৰিত পৃথিৱীৰ প্ৰথম নাৰী 'ঈভ'ৰ মাজেৰে কেথলিক খৃষ্টান ধৰ্মত নাৰীৰ স্থান অৱনমিত হোৱা কথাষাৰৰো সম্পৰ্ক থাকিব পাৰে।নে গোলাপৰ (Rosy flesh) ধাৰণাৰে ছ'নিয়ৰে মেৰী মেগডেলেন আৰু seeded wombৰে তেওঁৰ গৰ্ভস্থ সন্তানক ইংগিত কৰিছিল?

      ঘটনাক্ৰমে তেওঁলোকৰ হাতত পৰিল আন এটা পাঠ(cryptext)- ' The Holy Grail neath ancient Roslin waits. The blade and Chalice guarding over her gates '.ইয়াৰ Rosline শব্দটোৱে তেওঁলোকক লৈ গ'ল Rosslyn chapel লৈ।এডিনবার্গৰ দক্ষিণে অৱস্থিত এই বৃহৎ প্রাচীন গীর্জা ঘৰটোত অংকিত কৰা আছিল ইহুদী,খৃষ্টান,ইজিপ্তীয় আৰু প্ৰাচীন প্ৰকৃতিবাদী উপাসনা ধৰ্ম সম্পৰ্কীয় বহুতো প্ৰতীক।লেংডনে অনুমান কৰিলে -ঝাঁক ছ'নিয়ৰে সাংকেতিক ভাষাৰে লিখা Rislinৰ অৰ্থ Line of Rose -অৰ্থাৎ Ancestral lineage of Mary Magdalene. 

     উপন্যাসখনৰ শেষৰ ফালে বৰ্ণিত এই অধ্যায়টোত কাহিনীয়ে এক নতুন ৰূপ লৈছে।কাৰণ এই ৰ'জলিন চ্যাপেলতে তেওঁলোকে আশ্বৰ্যজনকভাৱে লগ পাইছে ঝাঁক ছ'নিয়েৰৰ বিধৱা পত্নীক-অৰ্থাৎ ছ'ফি নেভিওৰ বৃদ্ধা আইতাকক।বহু বছৰ পূৰ্বে এটা মটৰ দুৰ্ঘটনাত মৃত্যু হোৱা বুলি প্ৰচাৰিত এইগৰাকী বৃদ্ধাৰ প্ৰকৃততে মৃত্যু হোৱা নাছিল।ঝাঁক ছ'নিয়েৰৰ নিৰ্দেশত তেওঁ এই প্ৰাচীন গীৰ্জা ঘৰত আত্মগোপন কৰি প্ৰকৃততে ইমান বছৰে কেথলিক গীৰ্জাৰ কোপদৃষ্টিৰ পৰা ৰক্ষা কৰি আতঁৰাই ৰাখিছিল মেৰী মেগডেলেনৰ গৰ্ভত জন্মা যীচুৰ বংশৰ শেষ উত্তৰাধিকাৰীক-ছ'ফি নেভিওৰ ভায়েকক।

      কাহিনীৰ স্বাৰ্থত এনে এক ঘটনাৰ অৱতাৰণা কৰিলেও উপন্যাসিক ড্যান ব্ৰাউনে প্ৰকৃততে এই কথাই প্ৰকাশ কৰিব বিচাৰিছে যে যীচুৰ সন্তান আজিও পৃথিৱীত আছে।ঝাঁক ছ'নিয়ৰে তেওঁৰ সাংকেতিক ভাষাত লিখা 'Rosy flesh and seeded womb'ৰ ৰহস্য এনেদৰে ৰ'জলিন চ্যাপেলত উদ্ঘাটিত হোৱাৰ লগে লগে উপন্যাসখনৰ কাহিনীভাগৰ অন্ত পৰিছে।

     উপন্যাসখনৰ এক তাৎপৰ্যপূৰ্ণ দিশ হৈছে এয়ে যে লেখক ড্যান ব্ৰাউনে উপন্যাসখনত প্ৰাচীন প্ৰতীকতত্ব আৰু সাংকেতিক ভাষাৰ প্ৰসংগৰে শব্দৰ আমোঘ শক্তি আৰু ৰহস্যক সাৰ্থকভাৱে তুলি ধৰিবলৈ সক্ষম হৈছে।সামগ্ৰিক দৃষ্টিত গোটেই উপন্যাসখনকে প্ৰতীকতত্ব আৰু সাংকেতিক ভাষা বিষয়ক এখনি গৱেষণা গ্ৰন্থও বুলিব পাৰি।সেইদৰে শ্বাসৰুদ্ধকৰ কাহিনীৰ উপস্থাপন আৰু প্ৰাচীন মিথ,সাংকেতিক ভাষা,প্ৰতীকতত্ব আদিৰ ৰহস্যয়ো উপন্যাসখনৰ প্ৰায় প্ৰতিটো পৃষ্ঠাতে গভীৰ উৎকণ্ঠাৰ সৃষ্টি কৰিবলৈ সক্ষম হৈছে।উপন্যাসখনৰ আৰম্ভণিতে ঝাঁক ছ'নিয়েৰৰ হত্যাকাণ্ড আৰু তাৰ পাছতে ফৰাচী পুলিচে হত্যাকাৰীক বিচাৰি চলোৱা অনুসন্ধানৰ দৃষ্টিৰে উপন্যাসখনক এখন সাধাৰণ ডিটেক্টিভ উপন্যাস যেন লাগিলেও প্ৰকৃততে 'ড্য দা ভিঞ্চি ক'ড' হৈছে প্ৰাচীন ইতিহাস উদ্ঘাটনৰ এক অগতানুগতিক প্ৰচেষ্টা।(সমাপ্ত)